ORIYATLI ODAM


Oriyatli odam, dushmanlaring koʻp,
Estrada koʻrib koʻngling ezilar.
Sahnada olifta yigitlar bir toʻp
Goh ona tilingni masxara qilar…


Kassirlar mudraydi aeroportlarda,
Boʻm-boʻsh samolyotlar yigʼlab uchadi.
Tarsillab yopilgan darchalarda
Oriyat qadringning qonin ichadi.


Kampirlar moʻltirar yoshlari naq yuz,
Undan ham oʻtgandir, qaydan bilasan,
“Retseptsiz bermaymiz!
Retseptsiz bermaymiz!…”
Toshyurak sotuvchi qiz senga dushman.


Hatto uyingda ham bir dushmaning bor-
Televizor. Sindirging kelar gohida.
Kechalar bir odam – tulkiday ayyor,
Safsata sotadi iymon haqida.


Hiringlar gʻiybatni qiygan shovvozlar,
Koʻz tushsa yuzlaring bujmaygan tokdir.
Keyin loʻttibozlar,
Keyin qogʻozbozlar,
Keyin infarkt… keyin – yashasin, doktor!


Xayriyat, ulardan dushmanlarim yoʻq,
Tinmaydi dunyoda bir sobit qadam.
Oʻjarsan, qaysarsan ammo koʻnglim toʻq,
Sen uzoq yashaysan ey, yaxshi odam.


TALABALAR MADHIYASI


Alp o’g’lonlar o’lkasi bu ko’hna Turon,
Qalqonlari, qanotlari, ilm istang.
Yarim jahon bunyod etgan Sohibqiron,
Alisherning avlodlari, ilm istang

Taxtdan tushganda ham otdan tushmay yurgan,
Ajdodingiz uy qurmagan – Davlat qurgan.
Yurti uchun yelkasida tog’lar surgan – 
Rustamlari, Farhodlari, ilm istang.

Ko’z ochgandan kezib yetti bahri ummon,
Yetti tilda so’zlashgan biz tili biyron.
Vatanida Tojmahallar tiklar sulton – 
Boburlari, Behzodlari, ilm istang.

Haq yo’lida siz ilmning ummatlari,
Xalq yo’lida hidoyati, himmatlari.
Madad bo’lsin, Yassaviylar hikmatlari,
Bobo Mashrab bayotlari, ilm istang.

Ilm istang, izingizdan ibrat yog’sin,
Ixlosingiz, shaxdingizdan shiddat yog’sin.
Ortingizdan mag’rur-mag’rur millat yog’sin,
Mulki Turon najotlari, ilm istang!…

Alp o’g’lonlar o’lkasidir O’zbekiston,
Erkli elning qanotlari, ilm istang.
Yarim jahon bunyod etgan Sohibqiron,
Alisherning avlodlari, ilm istang.

✍ Muhammad Yusuf Sheʼri📚
https://t.me/Muhammad_Yusufsherlari1

UNUTISH
_____________________________________
Otam o‘gitlarin unutmoqdaman,
Unutyapman sekin, o‘zimni oqlab.
Sen kimning o‘g‘lisan? Kimning o‘g‘lisan?
Ortimda imonim yurar so‘roqlab…
_____________________________________
Men kimni aldadim. Ilk yolg‘onlarim,
Soxta tabassumim kimga ataldi?
Menga shuhrat tutgan xushomadlarim
Otamning qabriga tig‘day qadaldi.
_____________________________________
Otam o‘gitlarin unutmoqdaman,
Unutyapman ozg‘in yuz, qo‘llarini.
Ter hidi anqigan beqasam chopon,
Ketmoni, yaktagi yamoqlarini.
_____________________________________
Toleidan mamnun jufti halolim,
Tilla tishlarini ko‘rsatib kular.
Mening ko‘nglim bilan ishi yo‘q sira,
Suratimni izlab kitob titkilar.

Men esa otamni unutmoqdaman…
_____________________________________
✍ Muhammad Yusuf Sheʼri📚
👇👇👇👇
@Muhammad_Yusufsherlari1

TULPOR… 

Oq tulporim bor edi, 
Beklar unga zor edi. 
Ogaynilar, ot menga, 
Ham do’stu, ham yor edi. 

Yolin o’psam tiz cho’kib, 
Kaftimdan suv ichardi. 
Chu desam yer changitib, 
Osmonlarga uchardi. 

Xovlimizga bir oqshom, 
Qarindoshlar to’lishdi. 
To’y bahona otimdan, 
Ayirmoqchi bo’lishdi. 

Otam yigitsan o’glim, 
Uylanmasang or dedi, 
Qiz yarashar quchoqqa, 
Otga nima bor dedi. 

Ot oldida boshlandi, 
Chimildiqqa yo’lakcha. 
Kechir yorim na qilay, 
Otga mehrim bo’lakcha. 

Qoldi ikki o’t aro 
Go’shangada dildorim, 
Kelin kelgan kechadan, 
Arazladi tulporim. 

Bormi bizday oshiqlar, 
Bahorimda kuz yiglar. 
Qizni quchsam ot yiglar, 
Otni quchsam qiz yiglar. 

Bir bor o’psam hotinni, 
Uch bor o’pdim otimni. 
Jonni qiynab yashadim, 
Kimga aytay dodimni. 

Yordan kechdim otni deb, 
Elga bo’ldim ermaklar, 
Qaydan bilsin ot qadrin, 
Ot minmagan erkaklar.

👇👇👇👇👇👇
@Muhammad_Yusufsherlari1

O‘ZBEK QIZLARI


Bu Momo Havodan ularga odat:
Ushlasa gul ushlar qo‘lini faqat,
Kuyovga chiqmagan o‘zbek qizlarin
O‘psa faqat shamol o‘par yuzlarin.


Bu Momo Havodan ularga odat:
Nozik belda qirqta kokili qavat,
Silasa yomg‘irlar silaydi faqat,
Ko‘rsa faqat osmon ko‘rar ko‘zlarin —
Kuyovga chiqmagan o‘zbek qizlarin.


Jilmaysa nur yog‘ar gul yonoqlardan,
Sir yashirar hatto qizg‘aldoqlardan.
Oftob botgandan so‘ng xilvat bog‘lardan,
Behuda izlamang sira izlarin —
Kuyovga chiqmagan o‘zbek qizlarin.


Ko‘ngli daryoday keng, mehri ulug‘vor,
Dugonasi Hayo, sinfdoshi Or.
Ayting, farishtadan nima farqi bor,
Kuyovga chiqmagan o‘zbek qizlarin?..


Bardoshi oldida tog‘ — oddiy tuproq,
Ular etagidan jannat bir qadam.
Beayb Parvardigor, degandek biroq,
Yo‘q emas kichkina kamchiligi ham.
Sevadi,
Kuyadi,
Qiladi alam,
Dorga osing, ammo aytmas birovga.
Aytmay sevishini sevganiga ham,
Tegib ketaverar boshqa kuyovga!

👇👇👇👇👇👇
@Muhammad_Yusufsherlari1

Sodda Muhammadman

Sodda Muhammadman,
Sodda Muhammad.
Turkman qizni maqtab baloga qoldim.
Koʻylagiga havas qilgandim faqat,
Toabad tuganmas gʻavgʻoga qoldim…

Nedan ranjidingiz, jon singillarim,
Qaboqlar uyuldi, chimrildi qoshlar.
Turkman tushunmay tosh otsa, chidadim,
Ammo yomon botdi siz otgan toshlar.

Yorugʻ dunyoda-ku bari qiz goʻzal,
Millat tanlamas-ku husn degani,
Nigohim Jayhundan sakrab oʻtsa sal,
Qaydan bilay sizga malol kelganin.

Yurtim suluvlari, sizga yoʻq taʼrif,
Qoshingizda oʻsma yursa sirgʻalib,
Uzun sochingizni oʻrsangiz tarab,
Boqsa degan edim oy ham suqlanib.

Asli turkman qiz bir bahona, xolos,
Izlaganim edi sizlar kabilar,
Qoʻmsaganim hayo – momomlarga xos,
Sogʻinganim edi Kumushbibilar…

Yonsam, hajringizda mening yonishim,
Kuysam, siz tufayli koʻnglimdagi choʻgʻ,
Turkman qizlarda yoʻq mening tanishim,
Qalinga tuyam ham tushib qolgan yoʻq

👇👇👇👇👇👇
@Muhammad_Yusufsherlari1

,, Muhabbatʼʼ

Muhabbat, ey goʻzal iztirob,
Ey koʻhna dard, ey koʻhna tuygʻu.
Koʻkragimga qoʻlingni tirab,
Yuragimni toʻkib qoʻyding-ku.
Qancha koʻzlar menga zor edi,
Na gʻam, na anduhim bor edi.
Qushday yengil ruhim bor edi,
Chok-chokidan soʻkib qoʻyding-ku.
Ne qilarding menga tegib sen,
Yengilmagan edim — yengib sen,
Boshlarimni yerga egib sen,
Qomatimni bukib qoʻyding-ku.
Sen men uchun bir xayol eding,
Yaxshi bor yo yaxshi qol eding.
Jon kerakmi — mana ol endi,
Qiynar boʻlsang qiynab toʻyding-ku.
Bilmam, nima edi maqsading:
Menga bir juft guling asrading,
Birin otin Kumush atading,
Birin ismin Zaynab qoʻyding-ku.
Muhabbat, ey goʻzal iztirob,
Koʻchang kezdim sarson, dovdirab,
Yuzlarimga yuzlaring tirab,
Koʻzlarimni boylab qoʻyding-ku!.

MADINA


Madina, Madina, nega yig‘laysan,
Mening asal qizim, qachon uxlaysan?
Isitmang tushmadi, topolmadim dori,
Tinmadi chaqaloq joningning zori,
Yarashmas yashamoq nokasga yolvorib,
Chida, yorug‘ tongni kutamiz, qizim,
Biz hali hammadan o‘tamiz, qizim…


Sen yig‘loq tug‘ilding, men yozolmadim,
Yozgan she’rimni ham o‘tkazolmadim,
Ammo ishon axir, bulbul yuragim,
Men uni bekorga o‘tga solmadim,
Bu yorug‘ dunyoda mening qolar izim,
Biz hali hammadan o‘tamiz, qizim…


Ikkala qo‘limda sening beshiging,
Ko‘nglimda ko‘zingdek shaffof qo‘shig‘ing.
Tunlarimga navo qaytar kunim bor,
Senga ardoq so‘zim aytar kunim bor,
Qalbimni shudgordek haydar kunim bor.
Yig‘lab yozdirmasang aylanay o‘zim,
Biz hali hammadan o‘tamiz, qizim.


Shoir shunday ko‘pki, ularga yer tor,
Hammasi mashhur va hammasi nomdor,
Ulug‘vor, ularga yetmoq ko‘p dushvor,
Ammo ular oyga bosib yuzini
Turganda osmonin bag‘riga ilk bor
Biz olib borgaymiz tuproq isini,
Gulday dimog‘iga tutamiz, qizim,
Biz hali hammadan o‘tamiz, qizim!..

Biz hali hammadan o‘tamiz, qizim,
Yig‘lab yozdirmasang aylanay o‘zim.